Земаа од компаниите со образаложение да има за граѓаните, ама од нивниот џеб не им се дава. Функционерските плати кои неодамна пораснаа за 78%, никако да се намалат. Уште на 17 октомври, Владата требаше да претстави ново законско решение за намалување на платите. Барем според тогашните ветувања на вицепремиерот за економски прашања.
Минатата недела Владата не задолжи, работна група од 4 министри, кои што утре треба да дадеме законско решение за Законот за плати на избрани и именувани лица – рече Битиќи на 16.10.2023.
Три недели подоцна, вицепремиерот ретерира. Со еден закон не можеле да се опфатат сите 1.260 функционери па биле потребни седум законски измени. Ако истите се направат наеднаш, според Фатмир Битиќи, би било противуставно. Тој сега пак уверува, дека работната група ги разгледувала сите можности, и набргу ќе имало предлог пред Влада. Кога – не кажува точно. Според уверувањата на вицепремиерот, новото покачување за околу 400 евра од нова година нема да се случи.
„Измената во еден закон значи дерогирање на одредени права од друг закон што е противуставно. Работната група го разгледува тоа и набргу ќе има предлог за пред Владата, а потоа да биде проследен и до Собранието. Тоа што беше најавено помпезно дека ќе има зголемување, нема да се случи. Беше најавено дека заради методологијата сите функционери ќе добијат повисоки плати, но тоа нема да се случи в година и го нема“, рече денес Битиќи.
На функционерите тешко им оди да дадат дел од своите пари за граѓаните, ама кога се работи за туѓ џеб, очигледно не е проблем. Парите собрани од солидарниот данок можно е да бидат само пари дадени на вересија, бидејќи ако ова решение падне пред уставен, парите ќе мора да се вратат на компаниите.
„До моментов има законска обврска за плаќање на солидарниот данок. Средствата ќе се користат за антикризни мерки што ќе бидат познати наредните денови. Ако евентуално има таква одлука, има доволно средства во буџетот, но првенствено намерата е за антикризни мерки. Ако има таква одлука ќе треба да се земат пари од граѓаните да се вратат на компаниите што нема да се случи“, додаде Битиќи.
Средствата од наплатата на солидарниот данок на екстра профит кој го плаќаат големите компании, треба да бидат искористени за антикризни мерки за Буџетот во 2024 година. Власта планираше да собере 80 милиони евра, но собра помалку од 40.
Адријана Алексиеска
