Првиот круг претседателските избори најрано може да се одржи на 14 март, а вториот на 28 март. Според роковникот, инаугурацијата на претседателот на државата треба да биде на 12 мај 2024 година, кога истекува мандатот на актуелниот шеф на државата. Според тоа, најдоцна до 5, односно 8 мај треба да се одржи вториот круг претседателски избори.
Претседателот на Собранието, Џафери вели дека овој датум е цајтнот бидејќи остава мал простор за евентуални жалби и прегласувања. Џафери ги повика пратениците да формираат работна група, и најдоцна до нова година да постигнат консензус датумите за двата изборни процеси.
Немам намера никого да повикувам, а тие треба да бидат одговорни за ова прашање и да ме информираат. Најрано претседателските избори може да се одржат на 14 март, а најдоцна на 8 мај. Но 8 мај е цајтнот, бидејќи инаугурацијата на претседателот на државата треба да биде на 12 мај. Ако вториот круг од претседателските биде на 8 мај, можно е да останеме без претседател на државата ако има жалбени постапки, односно ако има прегласување на неколку гласачки места кои би влијаеле на резултатот на изборите. Ако се остави на мене јас секако не би одлучил вториот круг од претседателските избори да биде на 8 мај. Ако така одлучат партиите, ќе го почитувам тоа, но нивна ќе биде одговорноста ако евентуално не се избере претседател на државата – вели Џафери.
Парламентарните избори треба да се одржат во последните 90 дена од мандатот на пратениците, кој завршува на 4 август. Тие најрано би биле на 5 мај, а најдоцна на 15 јули, за да се остави простор за првата конститутивна седница – најдоцна 20 дена од гласањето.
Во меѓувреме, опозициските Беса и Алтернатива, поднеле барање за оглас за член на Државната изборна комисија. Седмото место во ДИК е празно откако Кренар Лога, премина во власт, и стана министер за правда. Сега е на ред комплетирање на Комисијата, за да може да ги подготви изборите.
Џафери информираше и за новиот Деловник, кој најверојатно ќе се гласа на 2 ноември. Утре почнува расправата по поднесените амандмани. Истиот ќе стапи на сила на конститутивната седница на следниот парламентарен состав.
Во врска со уставните измени, Џафери рече дека ништо не е сменето. Кога ќе има мнозинство за гласање, ќе ја закаже седницата.
Адријана Алексиеска
