Најмалку 39 луѓе загинаа во јужна Шпанија откако брз воз излетал од шините и се судрил со друг воз што доаѓал од спротивната насока. Повеќе од 150 патници се повредени, петмина се во критична состојба, а 24 се многу тешко повредени.
Несреќата се случила синоќа во близина на Адамуз, во покраината Кордоба, околу 360 километри од Мадрид. Во возот што прв излетал од шините имало вкупно 294 патници, четворица членови на екипажот и машиновозачот.
Причината за несреќата сè уште не е позната, изјави шпанскиот министер за транспорт. Претседателот на шпанската железничка компанија изјави дека човечката грешка речиси целосно е исклучена како причина за несреќата. Тој нагласи дека современите системи за безбедност се дизајнирани автоматски да интервенираат доколку машиновозачот направи грешка.
Се очекува, по анализата на таканаречените „црни кутии“, да се откријат причините што доведоа до една од најтешките железнички несреќи во последно време.
