Најмалку 16 лица, меѓу кои и ученици, се ранети во пукање во училиште во турскиот град Сиверек, југоисточна Турција. Напаѓачот, 19-годишник поранешен ученик кој до 9-то одделение учел во училиштето, на крајот се самоубил кога полицијата интервенирала. Рано утрото влегол во училишната зграда и почнал неселективно да пука во кого и да налетал. Гувернерот на Шанлиурфа, областа каде што е училиштето, за турските медиуми изјави дека во тек е истрага за мотивот на грозоморниот напад. – Повредени се 16 лица. Од нив, четворица се наставници, 10 се ученици, еден е полицаец и еден е оператор во менза. За среќа, нема жртви“, вели гувернерот. Тој сподели и детали за идентитетот и образовната заднина на лицето што го извршило делото. 19-годишниот напаѓач бил притиснат во училиштето од полицискиот кордон, и кога сфатил дека ќе биде фатен, си го одзел животот со оружјето со кое што пукал. Според проценката на ризикот, училиштето не било на високо ниво на ризик и затоа било без постојано присуство на полиција.
