Се прави се за пензионерите да излезат од категоријата сиромаштија, па затоа и линеарното зголемување на пензиите е оправдано. Ова е одговорот на премиерот Мицкоски за претстојното покачување на нивните примања за 1.000 денари во март. Тој вели дека не сака да ги коментира евентуалните одлуки на уставниот суд кој одлучува дали овој потег е противуставен. Задоволен е што стапката на сиромаштија се намалува, а се стеснува и јазот во распределбата на приходите.
А пензионерите ќе можат и да ги зголемат приходите со тоа што ќе бидат работно ангажирани. Министерот за економија и труд Бесар Дурмиши информираше дека стапи на сила законот со кој им се овозможува на студентите и пензионерите привремено и сезонски да работат без притоа да ги изгубат бенефитите што им следуваат. Ова според него ќе ја намали сивата економија.
Премиерот истакна дека буџетот е ликвиден и во добра кондиција. Потенцира дека е неопходно добро да се планираат финансиите затоа што за 4 и пол години треба да се вратат долгови од 6 и пол милијарди евра, направени од претходната влада, главно во време на пандемијата. Мицкоски вели дека освен еврообврзницата која Министерството за финансии ја врати лани од 500 милиони евра, достасуваат за враќање и други долгови годинава, а веќе се планираат и финансиите за 2027-ма кога достасуваат 500 милиони и за 2028-ма кога треба да се исплати уште една еврообврзница од 700 милиони евра.
Мицкоски најавува дека за на есен е планирано да се удри камен темелник на првата когенеративна централа на турската Акса вредна милијарда евра. Конечните детали треба да се договорат на состанок со компанијата за 10 дена. Премиерот вели дека очекува и други компании да донесат одлука да градат вакви централи во Македонија. Тој смета дека претстои плодна година на инвестициски план во делот на железничката инфраструктура. Заедно со Бугарија ќе се гради тунелот на граница, додека интензивно се гради втората делница, а планирано е годинава да се распише тендер за третата најтешка фаза од Крива Паланка до граничниот премин. Се прават напори за да се модернизира и пругата Скопје –Кичево, се развива проектот брза пруга долж Коридорот 10, напредува и проектот градски воз во Скопје, а ќе се набавуваат и нови локомотиви со цел побрз и поеколошки железнички транспорт.
