Економијата расте, навработеноста се намалува. И во услови на глобална нестабилност, македонската економија продолжува да покажува агилност. Економската активност во текот на годинава продолжува со солидно темпо што според премиерот Мицкоски дава надеж за уште поохрабрувачки очекувања за развојот на домашната економија која и натаму останува во европскиот врв. Мицкоски очекува економски раст меѓу 3 и 3,5 проценти во првиот квартал што е значајно во време кога светот се уште се соочува со сериозни економски и енергетски предизвици.
„Што се однесува до бруто-домашниот производ, сите индикатори коишто ги следиме од првиот квартал којшто веќе измина, тоа се месеците јануари, февруари и март, велат дека ќе имаме, во услови на епска светска енергетска криза, солиден раст. Јас би очекувал растот да се движи меѓу 3 и 3,5%. Номиналниот раст би бил можеби два до два и пол пати поголем од тоа, но да почекаме Државниот завод за статистика да ги објави бројките. Но, како и да е, повторно ова сега што ќе го кажам може некој на социјалните мрежи да го исмева, но како и да е, сега ќе бидеме не во првите пет, туку во првите три во Европа” – изјави премиерот Христијан Мицкоски.
Растот на економијата се одразува и врз пазарот на труд. За две години отворени се повеќе од 17 илјади нови работни места. Ваквиот тренд според премиерот е потврда дека економските политики на Владата се поставени соодветно и даваат резултати.
Инаку, бројот на вработени во Македонија достигна над 707 илјади луѓе, покажуваат најновите податоци на Државниот завод за статистика за првиот квартал од 2026 година. Статистиката покажува и намалување на невработеноста. Во првото тримесечје од годинава бројот на невработени е намален за еден процент во однос на крајот на 2025 година, а за 2,3 проценти во споредба со истиот период лани.Стапката на невработеност изнесува 11,3 проценти.
