Мерките за справување со нафтениот шок ќе предизвикаат минус во буџетот од 97 до 114 милиони евра. Помал прилив за 81,3 милиони евра ќе има само од намалените акцизи за 4 денари кај бензините и дизелот. Премиерот Мицкоски вели дека и покрај штетите врз државната каса, целта е да се заштити и задржи животниот стандард на граѓаните. Додава дека иако денеска има мало намалување на цените на нафтата на светските берзи, никој не очекува брзо завршување на кризата на Блискиот исток.
„Станува збор за 6-7 милијарди. Тоа се нашите проценки. Ја разгледуваме можноста да се направи ушет еден ребаланс, но она кое што претставува наш приоритет како Влада, е да го задржиме стандардот на граѓаните, да се контролира ниското ниво на инфлација, и нормално да ја задржиме најниската цена на горивата не само во регионот туку и во Европа“ – вели Христијан Мицкоски – претседател на Влада.
Засега инфлацијата е под контрола и е значително помала од онаа во еврозоната. Премиерот Мицкоски вели дека, очекувано, најголем предизвик со кој Владата се соочува е токму неизвесноста кога станува збор за нафтата. Засега се уште се размислува дали ќе има втор ребаланс на буџетот и колкави промени ќе има кај расходите и приходите.
За време на посетата на САД, министерката за финансии Димитриеска Кочоска, рече дека доколку се донесе одлука да се направи ребаланс на буџетот, нема да има корекции кај проекциите за економски раст, дефицит и задолжување. Министерката е задоволна од стапката на раст во вториот квартал од 4,3%. Дефицитот, пак, ќе остане на исто ниво, бидејќи би се кратело и кај приходите, и кај расходите. За неполни 9 месеци годинава, во буџетот биле собрани 4,2 милијарди евра или 68,34% од проектираното. Од државната каса, пак, биле потрошени 4,8 милијарди евра или 70% од предвиденото до крајот на годината..
