Најдоцна за еден месец, односно по вработувањето на потребните 10 медицински сестри и на петте социјални работници и психолози, во општините Прилеп, Кривогаштани и Долнени ќе започне да се имплементира пилот-проектот „Медицинска сестра во заедницата“. Овој Проект е новина не само во земјава, туку и во регионот, и се реализира со поддршка од австриското Министерство за социјални политики, здравство, нега и заштита на потрошувачи. Неговата цел е овозможување медицинска нега и грижа во домот на лица и семејства од социјален ризик, особено во руралните средини, по австриски урнек, за што неодамна беше организиран и студиски престој во Австрија.
„Во моментов веќе се воспоставени програмите како сето тоа ќе тече, процедурите на набавка ни се во тек, заради тоа што во рамките на овој Проект, со финансиска поддршка на Р. Австрија, ќе обезбедиме и мобилна опрема за обезбедување помош во домовите на лицата во социјален ризик, на хронично болните лица, да може преку медицинските сестри да им се обезбеди посеопфатна услуга…Со вработувањата започнуваме дел во март, дел во април, значи поделенои етапно, а проектот ќе трае до септември 2026 година“, – изјави Марина Тошеска од Центарот за едукација и развој, Прилеп.
„Во проектот сме вклучени со изнаоѓање детектирање на оние на кои најмногу ќе им биде потребна медицинската сестра во заедницата…Имавме многу што да научиме, многу корисни посети од кои што јас единствено извлеков заклучок дека ние можеме да имаме се’, меѓутоа можеби ни треба малку поголема организираност и малку поголема вклученост како локално, така и ние како институции, вие и сите заеднички можеме да ги имаме сите услуги кои што ги пружа Република Австрија во моментот“, – рече Зоран Малковски, директор на МЦСР, Прилеп.
Инаку, носител на овој Проектот е невладиниот Центар за едукација и развој, кој минатата година успешно го реализираше и Проектот за социјалната услуга „Помош и нега во домот“, и која услуга, заради евидентните корисни ефекти кај 210-те корисници, главно стари и изнемоштени лица, од први август лани, премина под „капата“ на државата.
