Македонското друштво „Илинден” – Тирана побара од Лорант Винче, европратеник на Унгарскиот демократски сојуз од Романија и претседател на Федералната унија на европските националности (ФУЕН), да го поддржи Извештајот за нашата земја во Европскиот парламент.
-Во име на македонското национално малцинство во Република Албанија, македонското друштво „Илинден“-Тирана бара да го усвоите Извештајот за напредокот на Македонија кон Европската Унија во Европскиот парламент, кој го содржи долгоочекуваното признавање на македонскиот јазик и македонскиот идентитет, се наведува во дописот.
Се додава дека „македонскиот јазик и македонскиот идентитет претставуваат рамноправен дел од културното и јазичното милениумско богатство на Европа”.
Исто така се нагласува дека македонскиот идентитет и македонскиот јазик се историски факт во континуитет од пред новата ера до денес и дека „Европскиот парламент има историска должност и одговорност да ја прифати историската вистина како цивилизациска придобивка”.
-Македонците во Република Албанија убедени се во вашата поддршка и искажуваат голема благодарност за вашето внимание и одлука. Завршувајќи го овој кус допис-барање, уште еднаш ви го искажуваме нашето највисоко почитување, се посочува во дописот потпишан од Никола Ѓурѓај претседател на друштвото.
МД „Илинден” веќе 10.години е рамноправна членка на ФУЕН, највисока малцинска организација во Европа.
Како што изјави Ѓурѓај идентично барање друштвото испратило и до Европска слободна алијанса (ЕФА).
Од март минатата година полноправна членка во ЕФА е партијата на Македонците во Албанија, Македонска алијанса за европска интеграција(МАЕИ).
