Десет луѓе се убиени, вклучувајќи го и напаѓачот, во незапаметено и едно од најсмртоносните масовни пукања во Канада во последните години, кое се случи во средно училиште во градот Тамблер Риџ, во Британска Колумбија.
Шест лица се пронајдени мртви во училиштето, уште едно лице починало на пат кон болница, а двајца мртви се пронајдени во приватен дом, што се верува дека е поврзано со пукањето, соопшти канадската полиција. Повредени се повеќе од 25 лица, од кои двајца се во сериозна состојба.
Полицијата го опиша осомничениот напаѓач како жена со кафеава коса, облечена во фустан. Таа била пронајдена мртва во истото училиште со прострелна рана, а полицијата верува дека се самоубила и дека немала помагачи.
Засега не е познато колку од жртвите се малолетници.
Тамблер Риџ е оддалечена општина со околу 2.400 жители во подножјето на Карпестите Планини, на 700 километри од Ванкувер. Според веб-страницата, тамошното средно училиште има 160 ученици од седмо до 12. одделение, на возраст од 12 до 18 години.
„Ова е мала, тесно поврзана заедница со мал одред на Кралската канадска полиција, која реагираше за две минути, без сомнение спасувајќи многу животи“, изјави Нина Кригер, министерка за јавна безбедност на Британска Колумбија. Мотивот за масакрот сè уште не е познат.
