Изградбата на водоводот, како последен услов за технички прием на Манастирскиот комплекс „Трескавец“, генерално веќе е завршена. После кражбата од пред 7 месеци на дел од веќе поставената надворешна водоводна инсталација, прилепски „Водовод“ успеа да ја надомести предизвиканата штета во висина од околу 10.000 евра и водата пак да ја донесе до ѕидините од Манастирот. Сега, на потег е манастирската Управа за внатрешно доинсталирање на мрежата, уверуваат од ЈКП „Водовод и канализација“.
„Повторно пред две недели го вративме во првобитна состојба. Тоа значи, сето што беше уредно пријавено во Полиција, се’ што беше украдено, повторно, со помош на средства од Општината, „Водовод“ и едно приватно претпријатие кое што не можам јавно да го кажам, помогна, и повторно резервоарите се полни. Останува таму сега на Манастирот – делот што не му е внатрешно среден. Со проект, отец Никодим така ми кажа, дека сега внатрешно ќе се досреди водоводната линија и ќе биде ставен во функција. Значи, од наша страна целосно е завршен проектот“, – изјави Игор Гулабоски, директор на ЈКП „Водовод и канализација“, Прилеп.
еѓутоа, според старешината на Манастирот, отец Никодим, за жал, работата воопшто не била толку едноставна, зашто Манастирот има некој вид забрана од прилепскиот „Завод и Музеј“, односно од Министертсвото за култура, за да преземе било какви активности за партерно уредување на просторот, а што би ја опфатило и водоводната линија во дворот од Манастирот.
„Заради конзервацијата на манастирската Црква, која е вредно културно-историско наследство, а која трае веќе со години и која сигурно ќе трае уште многу години, ние не смееме ништо да чепкаме. Со тоа губиме драгоцено време за конечно ставање во функција на Манстирскиот комплекс чие реновирање е завршено уште во 2020 година. Друг проблем е и Пречистителната станица која, според нашите сознанија, не ги задоволува предвидените стандарди. Прво сето тоа треба да се среди, па дури потоа можеме да зборуваме за отворање на Манастирот за јавноста. А тоа временски значи дека се потребни повеќе години“, – ни изјави за Алфа, отец Никодим.
Манастирот „Трескавец“ датира од 13-от век и е дел од националното културно наследство. Во февруари 2013-та година беше зафатен од силен пожар кој до темел ги пеплоса конаците. Огненаната стихија ја одмина само манастирската црква „Успение на Пресвета Богородица“, а која претходно, на очиглед на сите, со децении се распаѓаше. После пожарот, напоредно со возобновувањето на конаците, се пристапи и кон нејзината конзервација и чие завршување останува неизвесно.
