САД и Македонија ги издржуваа глобалните шокови и секогаш излегуваа посилни. Годинава двете земји одбележуваат 30 години од меѓусебните дипломатски односи, иако соработката почнала многу пред тоа, порача синоќа американската амбасадорка Анџела Агелер во своето обраќање по повод прославата на 4 Јули, Денот на независноста на Соединетите Американски Држави, што ја организираше амбасадата во својот двор.
„Веќе три децении му покажуваме на светот што може да се постигне со сила, компромис и со трпение. И покажавме како изгледа вистинско пријателство и вистинско партнерство. Тоа е отсликано во заедничките мисии во Ирак и во Авганистан и во големите вежби на Криволак, подготовките заедно да се бориме за зачувување на мирот. Тоа е разобличување на корупцијата и на криминалните организации, вложување во реформата на правосудството и покрај скромната исплатливост“, рече Агелер.
Според амбасадорката, блиските односи меѓу САД и Македонија се огледуваат и во заедничките напори за економски раст, напредок во инфраструктурата и во енергијата, соработката во технологијата, здравството, транспортот, разузнавањето и образованието, поддршката за зачувувањето на културното наследство, тешките но искрени разговори за теми од големо значење, како и споделената тага за загубените млади животи во страшен пожар. На актуелната влада, Агелер ѝ се заблагодари за поддршката кон САД за низа прашања, вклучително и неодамнешната поддршка во рамки на придонесот кон НАТО.
