Македонија го доби првиот иновативен технолошки парк за развој на современи иновации преку вештачка интелигенција и дигиталната трансформација.
Паркот N99 e наменет за едукативни и истражувачки содржини за студенти, компании и институции.
„Треба да подготвиме ученици, студенти, експерти и професионалци кои ќе можат да се вклучат во компаниите што работат во областа на дигитализацијата, вештачката интелигенција и иновациите. Доколку тие се добро подготвени, ефектот од нивното знаење ќе може да се искористи на највисоко ниво“, изјави Јаневска.
Поделен на четири сектори, во паркот се наоѓа и првиот хуманоиден робот „Алшар“, претставен како „професор од иднината“. Дел од содржината е и арената за сајбер безбедност, каде компаниите ќе имаат можност да учат како да препознаваат и спречуваат сајбер напади.
Целта е младите да научат да креираат со помош на напредната технологија, се обрати Максимилијан Федингер, потпретседател на Виенскиот институт за уметности и науки.
„Вашата работа за 10 години од денес ќе биде целосно поинаква. Ќе мора многу почесто да се надградувате. Вештачката интелигенција ќе ви помогне, но нема да ве замени“, изјави Федингер.
Од N99 технологии веќе соработуваат со над 40 компании од повеќе држави, што претставува голема можност за Македонија да ја зголеми својата меѓународна соработка.
Бојана Шурлиновска
