„Ни рекоа дека во нашата општина треба да обезбедиме соодветен простор за изградба на три времени кампови за сместување на албански граѓани при евентуални елементарни непогоди во земјата. Ние тоа и го сторивме. Но, за кратко време сфативме дека сме измамени, оти се виде дека не станува збор за изградба на времено-сместувачки капацитети, туку за мигрантски кампови“, обвинуваат Македонците од Пустец – Албанија.
„Фактички, овој настан се случи уште во јули месец кога Министерството за внатрешни работи на Албанија побара од градоначалникот на Пустец да каже кои се оние простори коишто исполнуваат услови за евентуални временски непогоди во Албанија. И со тоа, општината определи некои региони, како спортски игралишта, блиску до езерото, кои се лесно снабдливи со вода, имајќи предвид дека доколку има поплави или незгоди во Албанија, државјаните на Албанија да можат да се сместат одредено време во овие кампови. Меѓутоа, тоа не беше за тоа – тие бараа првични информации за да го лоцираат местото и сега ни дојде за оваа работа – за кампови за мигранти“, вели Таќо Гроздани од Мала Преспа, Албанија.
Гроздани е генерален секретар на Македонската партија во Албанија и еден од нејзините основачи, но и актуелен советник во Советот на општина Пустец. Вели дека добро ги познава албанските закони и затоа е убеден дека во оваа работа има скриени и нечесни намери на власта, заради што тие покренале и тужба против Владата на Албанија, откако и Општинскиот совет гласал против изградбата на мигрантски кампови во Пустец.
„Нашиот претседател Васил Стерјовски лично ја однесе тужбата до сите меѓународни институции, за ако и тие се соработници во оваа работа. Меѓутоа, мислам дека ќе се избориме и ќе ја победиме оваа битка, а очекуваме помош и од Македонија во оваа насока“, посочува Гроздани.
Инаку, според планот, на територијата на Република Албанија треба да бидат изградени вкупно 20 мигрантски кампови, а од нив дури три во општина Пустец. Општина Пустец брои околу 4.500 жители, има девет населени места каде живее претежно македонско население, а сите членови на Советот на општината се етнички Македонци.
