Судската летна ферија заврши и веќе има закажано десетина рочишта за предмети кои привлекоа огромно внимание кај јавноста. Првиот ден од септември, треба да продолжи судењето против поранешниот директор на клиниката за Геријатрија, кој заврши на обвинителната клупа откако побарал 100.000 евра за прием на пациент кој се наоѓал во лоша состојба. Рочиштето ќе се одржи во Кривичниот суд во Скопје. Во новата поголема судница во Идризово пак на 2 септември ќе продолжи судењето за предметот „Адитив“, случајот во кој според обвинителството при набавка на сомнителни адитиви за РЕК Битола и ТЕЦ Неготино е направена штета од над 6,5 милиони евра. Во истиот предмет на обвинителна клупа треба да седне и експретседателката на Антикорупциска, Татјана Димитровска која се товари за одавање службена тајна и комјутерски фалсификат.
Веќе следниот ден, на 3 септември, според судскиот календар, во Кривичен се закажани три рочишта интересни за јавноста – продолжува судењето против таткото на Васил Јованов, кој кон крајот на јануари на пешачки премин, на црвено светло и под дејство на алкохол ја усмрти 22-годишната Фросина Кулакова од Неготино. Зоран Јованов се товари за предизвикување тешки дела против општата безбедност. Второто рочиште истиот ден е против Раде Трајковски Штекли и уште девет лица за продажба на дрога, а судијата ќе треба да одлучи дали Штекли е способен да го следи судењето, откако одбраната тврдеше дека тој се наоѓа во лоша здравствена состојба. Истиот ден има рочиште и за ексдиректорката на Агенцијата за Националната агенција за европски образовни програми и мобилност раководеше Лидија Димова. Судењето почна пред три години, а еден од обвинетите призна вина. И покрај тоа, Димова до крај го убедува судот дека не направила штета од 20 милиони денари со злоупотреби на средства на европската заедница.
Веќе на 5-ти септември ќе започне судењето за случајот во јавноста познат како Онкологија, откако првото рочиште минатиот месец се одложи. Првообвинет е поранешниот директор на клиниката, Нино Васев со уште тројца онколози кои се товарат за несовесно лекување.
Две недели подоцна, на 22 септември, се очекува да продолжи и повторното рочиште за случајот познат во јавноста како „Беса Транс“, односно за сообраќајната несреќа која се случи во Бугарија пред 4 години, а во која загинаа 45 лица. Во овој случај првообвинет е сопственикот на компанијата, Беким Хаџиу, кој се гони дека превезувал лица со фалсификувана лиценца за меѓународен транспорт.
Во меѓувреме, јавноста очекува и датум за судењето за пожарот во ноќниот клуб Пулс во Кочани, кога во една од најголемите трагедии во земјава животот го загубија 62 лица. Обвинителниот акт за овој предмет против вкупно 37 физички и правни лица се уште е во фаза на оценка од страна на Кривичниот суд во Скопје, а откако ќе биде одобрен ќе биде распореден кај судија кој ќе го води предметот.
