Поранешниот градоначалник на Струмица, Костадин Костадинов, и уште пет лица се сомничат дека несовесно работеле и ја злоупотребиле постапката за набавка на електричните автобуси со кои цела година се врши јавниот градски превоз во општината, соопшти МВР. При таа постапка биле набавени 10 електрични автобуси во износ од околу 7 милиони евра, со што, според Министерството, е причинета материјална штета од поголеми размери.
Во пријавата се наведува дека Костадинов ангажирал лице без лиценца, кое било одговорно за евалуација на понудите и за надзор врз имплементацијата. Се сомничи и дека тендерот бил наштелуван.
Ексградоначалникот Костадинов ги отфрла наводите и тврди дека ги запазил сите постапки.
„Верувам дека сите овие чекори се спроведени според важечките закони“, објави на својот Фејсбук-профил Костадинов.
Останатите четири лица, меѓу кои директорот на „Струмица транспорт“ и членови на комисијата за јавни набавки, се товарат дека не извршиле надзор над целокупната постапка и имплементацијата на јавната набавка, во која учествувало лицето од Скопје без стручни компетенции, при што биле набавени 10 електрични автобуси на лизинг.
