Градоначалникот на Општина Бутел, Дарко Костовски, денеска изврши увид во активностите за поставување на нова енергетска фасада со површина од 3.000 квадратни метри на ООУ„Свети Климент Охридски“ во Бутел.
Како што информираа од Општината, новата висококвалитетна фасада ќе придонесе за поголема енергетска ефикасност на објектот и ќе ја намали потрошувачката на енергија.
– Со поставувањето на оваа фасада значително ќе се подобрат условите за наставата, а дополнително ќе се заштеди на енергија. Ги подобруваме условите на општинските основни училишта, изјави градоначалникот Костовски.
Од локалната самоуправа истакнуваат дека преку континуирани инвестиции се обезбедуваат најдобри услови за настава на учениците во сите основни училишта на територијата на Општина Бутел.
