Во Собранието денеска ќе заседаваат Комитетот за односи меѓу заедниците и комисиите за прашања на изборите и именувањата, за политички систем и односи меѓу заедниците и за финансирање и буџет.
За расправа пред Комисијата за политички систем и односи меѓу заедниците се предлог-законот за високи раководители, во прво читање, и предлог-законот за соодветна и правична застапеност, исто така во прво читање.
Комитетот за односи меѓу заедниците ќе одлучува за спроведување на постапката на гласање при донесување на предлог-законот за соодветна и правична застапеност.
Најавени се две седници на Комисијата за прашања на изборите и именувањата, а на првата ќе се одржи јавна расправа за утврдување предлог-листа од пријавените кандидати по одлуката за објавување јавен оглас за избор на член на Комисијата за спречување и заштита од дискриминација. Таа комисија на одвоена седница треба да утврди и предлог-одлука за изменување на одлуката за избор на претседател, членови и нивни заменици на Комисијата за следење соодветна и правична застапеност на граѓаните што припаѓаат на сите заедници, како и предлог-одлука за разрешување и именување на претседател и членови на Одборот за доделување на државната награда „8 Септември” и предлог-листа за избор на член на Комисијата за спречување и заштита од дискриминација.
Комисијата за финансирање и буџет, пак, ќе расправа за предлог-законот за изменување и дополнување на Законот за данокот на додадената вредност, во прво читање.
