ВоОпштина Берово денеска се одржа јавна дебата на тема „Асистивна технологија – алатка за социјална инклузија“, во организација на Здружението за асистивна технологија „Отворете ги прозорците“.
Настанот собра претставници од институции, организации, лица со попреченост, образовни асистенти и граѓани, кои имаа можност да се запознаат со современите асистивни уреди и решенија, како и со поддршката што ја нуди здружението во насока на подобрување на секојдневното функционирање и зголемување на пристапноста.
Преку презентации, практични демонстрации и отворена дискусија беа разменети искуства и предлози поврзани со унапредување на социјалните услуги, како и со создавање поинклузивна средина за сите граѓани.
Градоначалникот на Општина Берово, Петар Ружински, истакна дека локалната самоуправа останува силно посветена на поддршка на иницијативи кои придонесуваат кон еднакви можности и поголема социјална вклученост.
-Асистивната технологија претставува важен чекор кон еднаквост и достоинствен живот за сите граѓани. Како општина ќе продолжиме да поддржуваме проекти и активности кои ја унапредуваат пристапноста и инклузијата во заедницата- истакна Ружински.
Од Општина Берово информираат дека и во иднина ќе продолжат со поддршка на вакви иницијативи кои придонесуваат за развој на инклузивно општество и подобрување на квалитетот на живот на сите граѓани.
Од здружението „Отворете ги прозорците“ посочија дека продолжуваат со активности за промоција и примена на асистивните технологии, со цел нивна поширока достапност и примена во секојдневниот живот.
