Израелската војска објави пауза во воени активности во три области во Газа, набргу откако соопшти дека презела неколку чекори за олеснување на хуманитарната криза.
Паузата, која ќе го опфати и градот Газа, ќе трае од десет до 20 часот.
Египетските медиуми објавија дека камиони со помош тргнале од Египет кон Газа, што следува по неколку месеци меѓународен притисок и предупредувања од хуманитарните организации дека глад се шири низ палестинската енклава.
Израел, исто така, соопшти дека почнал да исфрла пакети со помош од воздух.
„Сакаме да нагласиме дека нема глад во Газа. Тоа е лажна кампања промовирана од Хамас. Обединетите нации и меѓународните хуманитарни организации се одговорни за дистрибуција на храна до населението во Газа, и тие треба да осигураат дека помошта нема да стигне до Хамас“, објавија Израелските одбранбени сили.
Десетици жители на Газа починале од неухранетост во изминатите недели, според Министерството за здравство на Газа.
Вкупно 127 луѓе, од кои 85 деца, починале од глад од почетокот на војната.
