Најмалку 50 лица загинаа, а околу 150 се повредени во нападот на бегалскиот камп Џабалија, на периферијата на градот Газа. Директорот на болницата во која беа однесени жртвите, ја потврди ужасната слика, но не даде точни бројки.
„Примивме голем број ранети и убиени во страшното гранатирање на Израел врз цивилните населби во бегалскиот камп Џабалија“, изјави директорот на болницата во Газа.
Одговорноста за нападот го презедоа израелските воени сили, наводно, со цел да го елиминираат, клучниот командант на Хамас во нападот врз Израел на 7 октомври.
„Пешадијата и оклопните сили го нападнаа Хамас во западниот дел на Џабалија. Го елиминиравме терористот Ибрахим Биари. Во операцијата убиени се и многу други терористи кои се криеја со него во зградата и подземниот простор“, вели Даниел Хагари, портпарол на израелската одбрана.
Меѓудругото, ИДФ соопшти дека во Газа загинале и 11 војници, сите на возраст од 19 и 20 години, што се најголемите загуби за нивните сили во еден ден откако почна војната.
