Со прекин на интернетот и телефонските линии, тешко е да се процени точната состојба во Иран. Светските агенции јавуваат за стотици загинати и ранети, како и илјадници уапсени на протестите против режимот. Американскиот претседател Доналд Трамп тврди дека Иран предложил преговори по неговата закана дека ќе ја нападне Исламската Република поради крвавото задушување на демонстрациите. Претходно, претседателот на иранскиот парламент ги предупреди САД и Израел дека би можеле да бидат мета доколку Америка го нападне Иран. Израелските власти внимателно ја следат ситуацијата.
Демонстрациите против раководството во Иран се проширија и во други земји во светот. Синот на соборениот шах на Иран, кој живее во егзил во САД, отворено ги поддржува протестите и тврди дека е подготвен да предводи прелазна власт во Техеран. Меѓународната заедница ги осуди настаните, а Генералниот секретар на ООН, Гутереш, апелираше до иранските власти да не применуваат насилство врз демонстрантите и побара пристапот до интернет повторно да им биде овозможен на граѓаните.
