Водата е темел на економскиот развој, а правичното управување создава можности за сите – порача министерот Муамет Хоџа на одбележувањето на Светскиот ден на водата во Скопје.
Најави дека со денешниот настан се отвора јавната консултација за управувањето со водите во сливот на реката Вардар – процес што треба да доведе до прв план за управување со речни сливови усогласен со европските стандарди.
– Денес, официјално ја отвораме јавната консултација за извештајот за значајни прашања за управувањето со водите во сливот на реката Вардар. Тоа е клучна фаза во изработката на планот за управување со речниот слив. Одржливите решенија може да се создадат само со учество на оние што најмногу зависат од нив – рече Хоџа.
Според него, транспарентноста и инклузијата се клучни за одржливи решенија.
– Ова што го почнуваме денес е порака дека управувањето со водите во нашата држава се гради со транспарентност, инклузија и одговорност. Одржливите решенија може да се создадат само со учество на оние што најмногу зависат од нив – посочи Хоџа.
Амбасадорот на Швајцарија, Кристоф Зомер, ја истакна важноста на заедничката работа и на инклузивното управување со водните ресурси.
– Мотото „Каде што тече водата, расте еднаквоста“ потсетува дека инклузивното управување е предуслов за правичен развој. Во Македонија секторите зависни од вода сочинуваат речиси една третина од додадената бруто-вредност и над една третина од извозот. Овие бројки покажуваат дека заштитата и одржливото управување со водата не се само еколошки приоритет, туку и основа за економска отпорност, јавно здравје и општествена благосостојба – посочи амбасадорот.
На настанот се одржа и уметнички перформанс претставен од Шарлот Кин – уметница со седиште во Швајцарија, активистка за вода и основачка на „Средба на водите“.
Настанот продолжи со панел-дискусија за родова и социјална инклузија во контекст на управувањето со водите и ризикот од поплави.
Светскиот ден на водата се одбележува секоја година на 22 март, со цел да се поттикне свеста за значењето на водата и потребата од одржливо управување со овој ресурс.
