Удар од гром е причината за пожарот што избувна во дел од производствениот погон на „Биокосмос“ во Велес, информираат од компанијата „Мирана“.
Од ударот се оштетени дел од просториите на „Биокосмос“ и, како што посочуваат од таму, тие привремено ќе бидат надвор од употреба додека не се санира штетата. Фабриката „Мирана“, која се наоѓа во истиот индустриски комплекс, не била зафатена од пожарот и производствениот процес таму продолжува непречено.
Во пожарот нема повредени лица. Центарот за управување со кризи претходно информира дека пожарот бил целосно локализиран рано утрово, околу 4 часот.
Според информациите на ЦУК, огнот зафатил магацински простор со фрижидери и канцеларии со документација, а на неколку места сè уште се забележува слабо чадење.
Инаку, во земјата утринава нема активни пожари на отворен простор. Сите, вкупно 11 што биле регистрирани во текот на ноќта, се изгаснати, информираат од ЦУК.
