Градоначалникот на општина Аеродром, Дејан Митески, денеска изврши увид во градежните активности за целосна реконструкција на улицата Лисец – крак десно, во Горно Лисиче – значаен инфраструктурен проект, со кој, по долг период, оваа важна сообраќајница добива нов, современ и функционален изглед, соопштија од локалната самоуправа.
Од Општина Аеродром истакнаа дека со реконструкцијата директно се подобруваат безбедноста, инфраструктурата и условите за секојдневно функционирање на жителите.
– Во рамките на проектот се поставува нов асфалт, се градат нови тротоари, а целиот потег добива уреден и модерен лик. Со проектот се реализира: целосна реконструкција на улицата во должина од 520 метри, поставување нов тампонски слој и нов асфалт, над 3.300 квадратни метри нова асфалтна површина, изградба на нови тротоари со површина од 1.400 квадратни метри – пишува во соопштението.
Паралелно и во согласност со предвидената динамика, како што информираа од Општината, се реализираат и активностите на улицата Лисец – крак лево, со што целиот овој дел од Горно Лисиче добива уреден, безбеден и современ изглед.
– Вредноста на проектот изнесува приближно 16,5 милиони денари и се реализира со поддршка од Владата. Општина Аеродром продолжува посветено и одговорно да инвестира во инфраструктурата и во подобрување на условите за живеење во секој дел од општината, со цел создавање современа, функционална и уредена локална средина за сите граѓани – потенцираа од Општината.
