Министерот за спорт, Борко Ристовски, денеска присуствуваше и ги поздрави учесниците на Генералното собрание на Европската еспорт федерација (ЕЕФ) што се одржа во Скопје, во организација на Македонската еспорт федерација.
Во поздравното обраќање, Ристовски ја истакна важноста на овој значаен меѓународен настан кој е потврда за угледот и позицијата што ја има Македонија во европскиот еспорт и за неговата растечка популарност во нашата држава.
На Собранието на кое главна точка беше изборот на нов претседател и еден член на Управниот одбор на ЕЕФ, присуствуваа 40 делегати од над 30 европски земји.
Во Скопје присуствуваше и претседателот на Меѓународната на Меѓународната еспорт федерација (ИЕСФ), Влад Маринеску, заедно со претставници на националните еспорт федерации од Европа.
Министерот Ристовски оствари средба со Маринеску на која му беше врачена Плакета за заслуги, како признание за неговиот придонес и поддршка во развојот на еспортот.
На Генералното собрание на ЕЕФ во Скопје, покрај изборот на новото раководство, на дневен ред беа и теми поврзани со работата и идните активности на федерацијата и понатамошниот развој на еспортот во Европа.
Генералното собрание е најважниот институционален состанок на Европската еспорт федерација, на кој земјите членки носат одлуки поврзани со раководството, работењето и идните активности на организацијата.
