Како може младите луѓе да се вклучат активно во еколошките процеси поврзани со Дојранското Езеро се најде во фокусот на еднодневниот форум „Потенцијали за соработка и здружување на локалните заедници за заштита на Дојранското Езеро“. Настанот се организира во рамки на проектот „Формирање на локални акциски групи и вклучување на млади луѓе“, спроведуван од здружението „ПОЛИМАТ 13“ од Богданци. Форумот е поддржан од истражувачкиот институт за конзервација на медитеранските водни живеалишта „Tour du Valat Foundation“ и Француската агенција за развој, а под менторство на Македонското еколошко друштво.
– Целта на форумот е да се отвори дискусија за можностите за заедничко делување на локалните чинители, институции и граѓански организации во насока на подобра заштита и одржливо управување со Дојранското Езеро. Во рамки на проектот кој почна лани, а ќе трае до крајот на годинава, спроведовме две теренски работилници, едната за набљудување птици со МЕД, а втората беше во соработка со истражувачкото друштво на студенти биолози, истакна Надица Маџирова од „ПОЛИМАТ 13“.
Во рамки на настанот се презентираа практични искуства и успешни примери на локално здружување во земјата, како и можности за иницирање на слични процеси во Дојранскиот Регион.
