Набавка на електрични автобуси, развој на инфраструктура за полнење во депоа и долж линиите, како и управување со енергетската мрежа и адаптација на системот на јавен превоз кон климатските промени. Македонските општини ќе користат европски искуства за модернизација и декарбонизација на јавниот превоз. За таа цел, минатата недела во Париз се одржа презентација во рамки на „Платформата за еколошки автобуси и одржлив возен парк“, на која присуствуваа и градоначалници од Македонија.
„Ја посетивме компанијата за јавен градски превоз „Франс де мобилите“. Таму ги видовме искуствата што тие ги имаат низ текот на годините. Со повеќе од 100 години постоење, оваа компанија организира превоз на повеќе од 100 милиони патници годишно, преку различни видови јавен превоз – метро, трамваи, автобуси и слично, и навистина беше впечатливо“, изјави Дејан Проданоски, градоначалник на Прилеп.
Овој студиски престој во Париз беше организиран од Европската транспортна заедница во Белград и Германското друштво за меѓународна соработка, со поддршка на Регионалната организација за јавен превоз на Париз. Според градоначалникот Проданоски, ваквите иницијативи се од големо значење за македонските општини, за јакнење на институционалните капацитети, но и за отворање можности за поддршка на урбаниот транспорт, зелената мобилност и инвестициите во одржлива инфраструктура, со крајна цел – поквалитетен јавен превоз, почиста животна средина и подобар живот за граѓаните. Сите трошоци за престојот во Париз биле покриени од Транспортната заедница, без користење средства од буџетот на општината.
Инаку, и македонската Влада веќе подолго време засилено работи на обезбедување поквалитетен и незагадувачки јавен градски превоз. За таа цел, во рок од 18 месеци треба да бидат набавени 150 еколошки автобуси, од кои 100 ќе бидат за Скопје, а останатите 50 ќе бидат распределени во другите градови каде што има јавен превоз. Првите 30 автобуси треба да бидат испорачани во рок од 6 месеци, следните 60 за една година, а останатите во период од година и пол. Неофицијално, Прилеп треба да добие најмалку два вакви автобуси, а веќе располага со четири еко-автобуси.
