Климатските промени, проследени со незапамтени високи температури веќе доведуваат до се’ помали и понеквалитетни земјоделски приноси, но и до вистинска борба за вода за наводнување. Македонските земјоделци се’ позагрижени. Недостигот од храна и вода стануваат и наша реалност, зашто на вакви температури ништо не вирее, не успева, децидни се тие.
„Значи, родот што е нагоре, горните цветови, горат – нема производство. Нема! Колку ние и да се бориме, и вода да пуштаме, и не знам што, темеретатурата е премногу висока…Прејаки се зраците, растението и под мрежа, го гори. Значи ставаме и заштитини мрежи, ама гори, не може да се заштити“, – вели Јулија Салилоска, земјоделка од Кавадарци.
Во беспештедната битка со природата, Јулија раскажува дека како земјоделци доведени се во ситуцаија дури и меѓусебно да се расправаат, да се караат.
„ Јас мислам дека за некоја година ќе биде војна за храна и вода. Значи, немаме ни вода. Реките пресушуваат, бунарите пресушуваат, нема вода. Се бориме, можам да ви покажам снимки каде ние војна водиме таму за да наводнуваме, дали ти ќе вадиш или јас ќе вадам. Се бориме, се караме сите еден меѓу друг. Нема вода. Страшно е“, – посочува Салилоска.
Милан Туманоски има 72 години и целиот свој живот е земјоделец. Меѓутоа, вели дека со вакво нешто досега не се соочил.
„Од 500 корени, три гајбичиња вакви домат набрав. Ништо, а треба да наберам барем 100 кила…Ова не било, не го памтам јас, а работам може 60 години земјоделие, не сум ни прематар, ништо, личномое продавам се’. Имам морков сеано, не никнуваше, па косев трева, го покрив, да има влага за да никне. И тој пак не никна како што треба. Многу лошо е“, – ни рече Милан Туманоски, земјоделец од Прилеп.
Оптимист не е ниту Ѓорѓи Кузманов од с. Дреново, кој над четири децении е земјоделец. „Треба поголема заштита на земјоделското производство, поголема финансиска помош од државата за поадекватни и посовремени инвестиции“, смета тој.
„Вчера одам попладнето грозје да берам – сето сварено, не можеш да набереш. Еве и народ нема, со жештините ни народ нема, слабо…На пример сега треба грозјето да биде заштитетно, доматот не е заштитен, болестите си влијаат, многу високите темпертури и не можеш да произведеш. И затоа и цените се високи“, – објаснува Ѓорѓи Кузманов, земјоделец од с. Дреново.
Според непосредните земјоделци, мерките за справување со последиците од климатските промени треба да станат национална стратегија како Македонија би го избегнала најцрното можно сценарио, односно да се соочиме со недостиг од храна.
