Вештачката интелигенција да се користи како алатка за напредок, но крајната одлука секогаш треба да ја има човекот. Ваква порака беше упатена од Меѓународната конференција што се одржува на штипскиот Универзитет. Седумдесеттина истражувачи и експерти од 15 држави разменуваат искуства за тоа како новите технологии може да се користат за унапредување на наставата, критичкото размислување, но и во борбата со сајбер-криминалот.
„Вештачката интелигенција може да ја насочува кривичната истрага. Не сакаме таа да донесува одлука во име на човекот за тоа кој ќе биде осомничен и како ќе се води постапката. Секогаш последен треба да одлучува човекот. Вештачката интелигенција може да помогне во обезбедувањето информации за планирањето на кривичното дело, да се лоцираат лицата од каде дејствуваат, со кого комуницираат, кои се нивните планови, сè она што е поврзано со комуникација и разузнавање“, изјави проф. Кејси Чу од Ендикот колеџ од САД.
Користењето на овие алатки не значи и замена на наставникот. Во време на брз технолошки развој, улогата на професорот станува уште поважна, бидејќи тој може да ја провери точноста на информацијата и критички да анализира, смета професорката од хрватскиот Универзитет во Осиек.
„Станува збор за многу комплексен процес во кој треба правната норма да ја толкувате на начин на кој ќе испитате колку е таа ефикасна и мора да ја ставите во контекст на другите правни норми во системот, а тоа вештачката интелигенција не го може“, изјави проф. Хелга Шпадина од Правниот факултет од Универзитетот во Осиек.
Новите технологии отвораат можности, но истовремено носат и предизвици, особено во образованието, бидејќи секогаш постои ризик од нивна злоупотреба. Вештачката интелигенција веќе се воведува во образовниот систем, но експертите предупредуваат дека при нејзиното користење мора да се почитуваат етичките принципи и правила.
