Над 2500 осуденици чекаат да влезат во затворските ќелии бидејќи нема слободни места. Во меѓувреме дел од нив по вторпат, па и по третпат ги повторуваат делата за кои биле првично осудени..
Просторот и состојбата во затворот Идризово не дозволува да престојуваат и оние што се внатре, не па да дојдат ново старите затвореници
Во 4 метри квадратни наместо по двајца, казна затвор издржуваат по 8 затвореници, а место нема ниту за душеци на земја, пренатрупеноста и условите во затворите се вечна критика во извештаите на меѓународната заедница. Директорот на затворот Идризово за Алфа појаснува дека главниот проблем е просторот бидејќи затворениците се поделени во неколку одделенија и не смее меѓусебно да се мешаат.
Околу 1200 затвореници издржуваат казна во овој момент. Најпроблематично е затвореното одделение каде казна издржуваат осуденици за тешки кривични дела и тие не смее да бидат сместени надвор од тоа одделение. Просторот навистина е проблем, нема место ниту во ќелиите, ниту во одделенијата. Ако треба во една ќелија да се сместени по двајца, од што нема простор се сместуваат и по 8 осуденици, вели Зоран Јовановски, директор на КПУ Идризово.
Вратите на ќелиите каде се сместени затвореници осудени на доживотно не се затвараат и се неисправни, а исто така пропадната е и американската донација од 1 милион евра за скенер и проверки при влез во затворот, откриваат извори за Алфа. Кој и зошто пуштил стаорци во просторијата каде бил сместен скенерот е тајна која никогаш не е откриена, а со тоа олеснет е и влезот на забранети стоки внатре.
И народниот правобраниел Насер Зибери при редовните контроли во Идризово изнесе шокантни информации. Според него во 14 метри квадрати спијат и по 15 лица, за некои од нив нема ни душеци, а останатите спијат на кревети на четири спрата. Најзагрижувачка состојба според Зибери има во четвртото крило. Таму се сместени над 120 затвореници од кои 36 спијат на под во ходник и користат заеднички тоалет. Има и затвореници кои спијат на ист кревет, во смени или заедно, бидејќи нема место
Еден од главните проблеми според обдусманот е и тпоа што често се менуваат директорите на Идризово, па така, од декември 2021 до јуни 2023 сменети биле четворица менаџери на затворот.