Еден загинат и двајца ранети во престрелка што синоќа околу полноќ се случила во скопски Чаир. Во инцидентот, учествувале две групи на паркинг во Чаир поради претходно недоразбирање во сообраќајот.
Според МВР, на клиниката за хируршки болести „Свети Наум Охридски“ во Скопје, синоќа биле донесени две лица на возраст од 35 години со повреди од огнено оружје кои учествувале во пукањето.
На повредите им подлегнал Х.Б. од Скопје, а над А.Д., исто така од Скопје, била извршена интервенција и е задржан на лекување. Со повреди од огнено оружје се здобил и Н.Д., кој бил пренесен на Комплексот клиники „Мајка Тереза“.
Во врска со инцидентот, полицијата во раните утрински часови уапсила четири лица за кои постои сомнеж дека биле инволвирани во престрелката. Приведените се на возраст од 22, 28, 39 и 41 година.
„Лицата, се задржани во полициска станица, а по целосно расчистување и документирање на случајот, против нив, ќе бидат поднесени соодветни пријави“, соопштиле од МВР.
