Две држави понудиле да пружат „поинтензивна и подолгорочна“ терапија за пациенти од пожарот во Кочани, соопшти министерот за здравство Арбен Таравари на денешната прес-конференција, одговарајќи на новинарско прашање.
„Два центри каде што ќе се спроведува рехабилитацијата на пациентите се: еден е Ковид-центарот во ГОБ „8 Септември“, а другиот е Институтот за рехабилитација и физикална медицина во Козле. Тие ќе бидат главни центри. Да се надеваме дека ќе има што помалку пациенти кои ќе имаат потреба од подолготрајна рехабилитација. За оние кои ќе требаат посериозна и подолгорочна терапија, веќе имаме понуди од две држави“, информираше Таравари.
Министерот истакна дека ако има многу тешки случаи, една од опцијите е да се испратат во странство без да се плаќа од страна на Фондот или Министерството за здравство.
Претходно, Министерството за здравство информираше дека пристигнале тимови од странство со големо искуство во рехабилитација на пациенти со изгореници, кои моментално прават евалуација на условите и апаратурата во неколку центри за рехабилитација на изгорени пациенти.
