Застрелан маж утринава на паркинг среде Скопје. Идентитетот на жртвата и мотивот за убиството кое се случи во близина на ТЦ Мавровка сред бел ден се сеуште непознати.
Откако го застрелале тројцата осомничени избегале од паркингот, а по брзата реакција од полицијата, две лица се уапсени откако возилото со кое најверојатно избегале од паркингот кај Мавровка, било забележано во скопски Чаир. Полицијата ги пресретнала, па дошло и до престрелка помѓу групата и полицајците. Во моментов се трага по третиот осомничен, а според официјалните информации идентитетот и е познат на МВР.
Двајцата осомничени се фатени откако дел од Скопје беше затворен , се прегледуваа домови и возила, а во потрагата беа вклучени специјални полициски сили, хеликоптери и дронови.
на подрачјето на општина Чаир, забележено е патничко возило, кое се обидело да побегне, при што лицата од возилото пружиле отпор со употреба на огнено оружје. Полициските службеници возвратиле, по што едно лице е лишено од слобода. При преземањето понатамошни мерки, од слобода било лишено уште едно лице, а на полицијата е познат и идентитетот на третото осомничено лице кое е во бегство и за кое се преземаат мерки за негово пронаоѓање, велат од МВР.
Во текот на денот имаше повеќе шпекулации за идентитетот на жртвата. Првичните неофицијални информации беа дека станува збор за адвокат, а последните пишувања се дека станува збор за бизнисмен кој имал дуќан за бижутерија и најверојатно бил мета на крадци. Неофицијално од автомобилот на жртвата биле одземени и неколку предмети.
Граѓаните велат дека се исплашени од ваквиот случај и очекуваат убијците да бидат фатени
Убиството се случува по неполни 24 часа од пукањето во скопската општина Ченто во која беше ранет 43 годишен жител од Австрија . Во мажот со иницијали Н.А било пукано додека возел во неговиот автомобил, тој е префрлен на лекување во комплексот клиники Мајка Тереза, а случајот се уште се расчистува.
