Брзото менување на демографските состојби во државава со се’ повеќе стари лица, кои често се сами и изнемоштени, го вклучи црвениот аларм и во Прилеп. Единствениот Дом за стари лица во општината, а кој згрижува граѓани од цела Македонија, со својот капацитет од 150 места, станува претесен. Листите на чекање и овде се евидентни, па локалните власти – достоинствената институционална грижа за највозрасните, ја ставија високо на приоритената листа.
„Веќе во завршна фаза е и ќе се отвори Центарот за активно стареење во МЗ „Рид“ и.т.н. Значи, целосна посветеност на ЛС во подобрувањето на квалитетот на живот на луѓето во третата доба….Во фаза сме на креирање на буџетот за 2026 година, а сме и во преговори со Министерството за социјална политка, демографија и млади да го подобриме буџетот кој што стигнува, затоа што е заедничка надележност…и се’ што може да се искористи од општествено-одговорните компании и за зголемување на капацитетот на Домот за стари лица, но и да се подобрат условите“, – изјави Дејан Проданоски, градоначалник на Прилеп.
Напорите за што похумани услови во Домот, делумно веќе се и реално видливи. Само во оваа година, преку инвестиција од 3.100.000 денари во современа опрема, значително се подобрени условите за работа на вработените, а особено условите за живот на штитениците, со цел тука сите да се чувствуваат достоинствено, почитувано и безбедно.
„Сакам да најавам дека во завршна фаза е системот за ПП-заштита во Домот, проект кој чини околу 2 милиони денари и кои средства се обезбедени од буџетот на Домот. Со ова, дополнително се подигнува безбедноста на корисниците на повисоко ниво“ – рече Благојче Стојаноски, директор на Домот за стари лица „Киро Крстески – Платник“ во Прилеп.
Старскиот дом во Прилеп, за првпат како уснаова, е основан уште во далечна 1956 година, а додека на сегашната локација функционира од 1977 година. Сега, од ЛС освен што најавуваат негова надградба со цел зголемување на капацитетот, велат дека се размислува и за обезбедување на нови локации за отворање и на приватни домови за старите и болни лица.
