Научното дело „Континуитетот на македонскиот јазик“ од проф. д-р Михајло Марковиќ и проф. д-р Соња Новотни ја доби државната награда „Гоце Делчев“ за 2026 година.
Ова научно дело ја продолжува традицијата со значаен и специфичен придонес во проучувањето на македонскиот јазик неколку векови наназад.
Добитниците се заблагодарија за честа за оваа значајна државна награда и истакнаа дека ова за нив не е само личен успех, туку и поттик и обврска да продолжат со уште поголема посветеност, одговорност и љубов кон она што го создаваат во областа на историјата на македонскиот јазик.
„Македонскиот јазик преку ова дело ја покажува својата жилавост, уникатност и континуитет пренесуван низ вековите од непокорниот македонски народ. Ова признание не би било возможно без поддршката од многу луѓе“, изјави проф. д-р Соња Новотни.
Министерката Весна Јаневска истакна дека ова дело се вбројува меѓу оние дела кои анализираат клучни лингвистички прашања за македонскиот јазик и неговиот лексички фонд.
„Делото ја обработува врската помеѓу старите текстови и современиот македонски јазик, односно систематски ја документира неговата еволуција, ја анализира структурата и употребата и ја истакнува неговата улога како носител на културниот и националниот идентитет“, изјави Весна Јаневска, министер за образование.
Претседателот на одборот Живко Попов истакна дека ова дело низ едно опсежно истражување дава приказ на непрегледното богатство на македонскиот јазик.
„Значајноста на ова дело е и во трпеливата и високо стручно завршена работа од страна на авторите. Споредбата на над шестотина лексеми од различни временски периоди, од кои половината се предмет на обработка во овој прв дел од нивниот труд“, изјави Живко Попов, претседател на одборот.
Во контекст на значењето на наградата, во иднина ќе се предложи нова Национална програма за научно-истражувачка дејност, а ќе се зголеми и буџетот за финансирање на научно-истражувачки проекти од национален интерес.
