До крајот на годината повторно ќе има гласање во четирите општини каде што локалните избори пропаднаа поради недоволен цензус. Од моментот кога Државната изборна комисија ќе ги потврди конечните резултати, ќе почне да тече рокот од 60 дена за распишување нови избори.
Собранискиот спикер Африм Гаши постизборно на брифинг со медиумите. Потврди дека во тек се консултации со ДИК за ова прашање, бидејќи, како што појасни Гаши, постојат одредени нејаснотии околу процедурите. Собранискиот спикер најави дека мандатот на актуелниот состав на ДИК истекува на 15 јануари 2026та и дека се преземаат сите чекори за изборниот процес во овие општини да може непречено да се реализира. Паралелно со изборните подготовки, Собранието влегува во нова, интензивна законодавна фаза. Според најавите, Предлог-буџетот за 2026 година ќе се најде на пленарна седница на 9 декември, а рокот за поднесување амандмани е до 10 ноември. Гаши информира дека на 11 или 18 ноември ќе се одржи редовната седница за пратенички прашања, каде што опозицијата ќе може да поставува прашања до Владата.
Во фокусот на координациите е и Изборниот законик — тема околу која власта и опозицијата покажуваат ретка согласност. На денешниот собраниски брифинг, сите координатори на пратеничките групи изразиле подготвеност да седнат и консензусно да ги донесат измените во Изборниот законик. Гаши потенцираше дека, доколку од Владата стигне предлог за нов изборен законик, Собранието ќе го стави во процедура без одлагање.
Меѓу актуелните теми е и Законот за локална самоуправа, за кој Гаши порача дека неговото донесување целосно зависи од политичката волја на пратеничките групи. Доколку има согласност, законот веднаш ќе биде ставен во собраниска процедура.
Засега нема најава на отворање на Уставот по ниту едно прашање, потенцира Гаши одговарајќи на новинарско прашање околу мислењето на Венецијанската комисија дека потребни се уставни измени за поголема независност на Јавното обвинителство.
Спикерот потврди и дека до Собранието сè уште не е пристигната најавената резолуција за црвените линии од лидерот на СДСМ, Венко Филипче.
Годината ќе ја одбележи натрупана агенда — од буџетот и изборниот законик, до подготовките за повторно гласање во четири општини. Според најавите, Собранието планира до јуни целосно уредување на својот двор со електронска рампа и нов паркинг систем, додека политичките разговори околу изборните и уставните теми ќе продолжат со цел да се осигура стабилен институционален тек.
