Син, ќерка, сопруга, евентуално снаа и зет. Сите можни роднински врски се гранки на дебелите семејни стебла во македонското судство. Праксата, децата и сопругите на судиите и обвинителите да им станат колеги во канцелариите каде гонат и судат, никако да згасне. Синот на Талат Џафери, високиот функционер на ДУИ и поранешниот собраниски спикер, снаата на функционерката на СДСМ, Цветанка Иванова, сопругата на шефот на Организиран Криминал Ислам Абази. Ова се само неколку пуштени гранки на функционери во судскиот систем за кој се пишуваше неодамна.
Дел од правната фела се зачудени од овој тренд за кој никој не понесува никаква одговорност, а непотизмот царува. Според нив, државата мора да најде механизам како еднаш засекогаш семејните стебла и партиските врски да немаат влијание врз правосудството.
Непотизмот има зародиш уште во Академијата за судии и обвинители. Една петтина од кандидатите кои завршуваат се роднини на функционери.
За ова реагираше и минатиот состав на Антикорупциска. Законот за јавни обвинители забранува роднини, сватови и партнери да се вработат во исто обвинителство. Исто така и Советот на јавни обвинители мора да внимава каде ќе ги распредели роднините, предупредуваа антикорупционерите.
Функционерите во судството имаат очигледно наследна функција. Па така, Кирил Геогиев, судија во Кривичен е син на судијата Наќе Георгиев кој сега лежи затвор за мито од 10 илјади евра.
Илир Јакупи, кандидат на Академијата е син на судијата Субхи Јакупи во Управен суд и поранешен член на ДИК по предлог на ДУИ. Тој исто така му е и зет на осудениот митаџија Иџет Мемети, екс член на Совет на Обвинители и поранешен народен правобранител, Зоран Здравев избран за судија и син на екс претседателот на Судски совет Киро Здравев. И синот на специјалната обвинителка Елизабета Јосифоска стана судија.
Јавноста се шегува со судските гени на децата на функционерите на третата власт. Да не знае човек дали е семеен ручек, куќна слава или судско рочиште. Таткото функционер, обвинет за криминал, синот судија, а мајката член на Советот на јавни обвинители, иронично коментираат граѓаните на социјалните мрежи по јавно објавениот непотизам.
И покрај критиките во извештаите на Евроската комисија и изјавите на меѓународните преставници во земјава, сепак непотизмот се уште царува и не е направени ништо за негово искоренување.
