Министерката за финансии Гордана Димитриеска-Кочоска денеска во Брисел учествува на редовниот годишен Економски и финансиски дијалог меѓу ЕУ и регионалните партнери, на кој присуствуваат претставници на членките на Унијата и на земјите од Западниот Балкан, на Грузија, Молдавија, Турција и на Украина.
Економскиот и финансиски дијалог е годишен состанок на ЕУ и партнерите посветен на прашања од сферата на економската политика.
Фокусот на овогодишниот, 11-ти по ред, Дијалог ќе биде на зајакнувањето на конкурентноста на Европа во контекст на актуелните геополитички случувања и потребата од поедноставување на правната рамка за намалување на административниот товар врз компаниите.
Како што соопшти Министерството за финансии, Димитриеска-Кочоска ќе се осврне на реформите што ги презема македонската Влада на полето на подобрувањето на конкурентноста на економијата, со крајна цел забрзување на економскиот раст.
Покрај министрите за финансии и гувернери на централните банки на членките на ЕУ и на партнерските земји, на Економскиот и финансиски дијалог учествуваат и претставници на Европската комисија, Европската централна банка и на Европска инвестициска банка.
Предвидено е на состанокот да бидат усвоени заеднички заклучоци, кои во наредниот период ќе бидат основа за креирање на политиките и спроведување на реформите на патот на земјава кон целосна евроинтеграција.
Дијалогот ќе се одржи пред заседанието на Советот за економски и финансиски работи на ЕУ, на кои главни теми ќе бидат правила за ДДВ за увезените стоки, предлозите за измени за регулативата за финансиски услуги и нејзината имплементација, предизвиците поврзани со руската агресија врз Украина и Механизмот за закрепнување и отпорност на Г20.
Покрај ова, европските министри ќе разменат мислења за иницијативата за создавање на Унија за штедење и инвестиции, а ќе одржат и политичка дебата за програмата „Безбедносна акција за Европа“ (САФЕ).
