Крушево, Долнени и Могила се трите пелагониски општини во кои денеска граѓаните гласаат по вторпат за избор на градоначалници. Во Крушево, во вториот круг право на глас имаат 7.768 гласачи кои гласаат на 23 избирачки места, во Долнени на 40 избирачки места ќе гласаат 11.929 граѓани, а додека во Могила евидентирани се 4.671 гласач кои ќе гласаат на 23 избирачки места.
Втор изборен круг има и во Македонски Брод каде гласачкото тело брои 4.835 лица и се гласа на 53 избирачки места. Гласањето во општините Могила и Македонски Брод, се специфични по тоа што во овој втор круг, реално се гласа само за еден кандидат, откако после првиот круг, нивните противкандидати се откажаа од изборната трка, иако, согласно Изборниот законик, имињата и на откажаните кандидати ги има на избирачкото ливче.
Според информациите добиени од ОИК во овие општини, утринава сите гласачки места отворени се навреме, односно точно во 7 часот, и досега гласањето секаде се одвива непречено, во фер и демократска атмосфера. Излезноста во претпладнвените часови во Крушево изнесува околу 15% и споредена со првиот круг е поголема. Слична е ситуацијата и во Долнени, во Могила и Македонски Брод.
Инаку, во текот на вчерашниот ден, своето право на глас први го искористија болните и изнемоштените лица, при што во Крушево гласале 255 такви лица и се за 37 лица повеќе од првиот круг, а додека во соседната општина Долнени гласале 134 гласачи. Овие лица, согласно Законот, гласаат дома или во установите каде што се сместени, во присуство на членови од надлежните Избирачки одбори. Во првиот круг овие две општини беа едни од општините со најголем процент на излезност од 67, 28% и 56,84 отсто.
