Делегација на Општина Вакарици, Италија, населена главно со Арбареши, предводена од градоначалникот Антонио Помило, беше во посета на Дебар, каде оствари средба со градоначалникот Фисник Меља.
„На средбата се разговараше за зајакнување на соработката во областа на културата и зачувувањето на заедничкото наследство. Исто така, беше разгледана можноста да започнат процедурите за збратимување на двете општини, како основа за заеднички проекти и активности во иднина“, објави Меља на Фејсбук.
Оценува дека средбата претставува важен чекор кон зајакнување на соработката меѓу двете општини.
Се очекува со збратимувањето на општините Дебар и Вакарици да се воспостави институционална и долгорочна соработка, со заеднички проекти во културата, туризмот и други области од взаемен интерес.
Делегацијата се запозна и со убавините кои ги нуди подрачјето кај Дебарско Езеро и оддаде почит пред споменикот на Скендер бег, во центарот на градот.
