Напредокот и предизвиците на зелената и дигиталната трансформација, институционалните капацитети, инвестициските потреби и усогласувањето со приоритетите на Европската Унија ќе бидат во фокусот на панел-дискусијата и презентацијата на публикацијата „Двојна по име, асиметрична по мерка – Зелените и дигиталните реформи во Македонија: асиметрии, јазови, причини и финансиски ризик“, што ќе се одржат денеска во Europe House vo Скопје.
Публикацијата ги анализира зелената и дигиталната трансформација во земјата, со посебен акцент на спроведувањето на јавните политики, институционалните ограничувања, потребните инвестиции и финансиските ризици поврзани со двојната транзиција.
Централниот дел на настанот ќе биде посветен на панел-дискусија за зелената и дигиталната трансформација на Северна Македонија. На неа се најавени министерот за дигитална трансформација Стефан Андоновски, Стефано Елеро, раководител за соработка во Делегацијата на Европската Унија, министерот за животна средина и просторно планирање Муамет Хоџа и државниот секретар во Министерството за енергетика, рударство и минерални суровини Горан Јовановски.
Учесниците ќе ги разгледаат можностите и ризиците од двојната транзиција, ќе ги идентификуваат постојните празнини и ограничувања и ќе дискутираат за препораки за политики насочени кон одржлив развој, економска конкурентност и европска интеграција.
Настанот го организираат Институтот за демократија „Социетас Цивилис“ – Скопје, Фондацијата „Конрад Аденауер“ и Центарот за европски студии „Вилфрид Мартенс“ од Брисел.
