Македонија е подготвена да ѝ помогне на Бугарија во справувањето со последиците од катастрофалните поплави, соопшти бугарскиот претседател Румен Радев по телефонскиот разговор со македонската претседателка.
Радев ѝ се заблагодари на Сиљановска Давкова за изразеното сочувство за загинатите во поплавите во Бугарија, како и за понудената подготвеност на Македонија да помогне.
Разговорот се одржа во момент кога Бугарија се соочува со интензивни врнежи и сериозни поплави кои зафатија повеќе региони. Дел од населението остана без електрична енергија, а пристапот до најпогодените подрачја е ограничен.
Според последните информации, поплавите однесоа четири човечки животи. Најмногу е погодена западна Бугарија и крајбрежјето, особено околината на Бургас.
Поплавите настанаа по поројните дождови во неверојатни количини. Според мерењата, наврнале над 250 литри дожд на квадратен метар.
