На денешен ден пред четири години започна руската инвазија врз Украина, со порака од Владимир Путин, „мора да ги ослободиме нашите територии од украинскиот режим“. Мировен договор сè уште нема. Подолг период веќе фронтот останува стабилизиран. Москва контролира околу една петтина од украинската територија. Мировните преговори засега не вродуваат со плод, а вооружените напади едни кон други продолжуваат со засилено темпо. Според информациите од американска тинк тенк организација, 1,8 милиони луѓе ги загубија животите на бојното поле. è
Володомир Зеленски, Украинскиот претседател е подготвен да го замрзне конфликтот на моменталната линија на војната, односно на териториите на Донбас и да ја прифати моменталната состојба, но бара силни безбедносни гаранции од партнерите.
„Речиси сè имаме ставено на хартија, но се уште не е потпишано. Не е потпишан од САД. Мислам дека за прв пат САД сакаат да потпишат безбедносни гаранции во истиот момент кога предлогот од 20 точки ќе биде прифатен од сите нас“, изјави Зеленски.
По ова интервју, Зеленски се обрати и од сопствениот бункер, а на мрежата X испрати порака до украинскиот народ во кој рече дека Путин не ги постигнал своите цели.
„Ја зачувавме Украина и ќе направиме сè за да постигнеме мир и правда. Сакаме мир – силен, достоинствен мир што трае“, посочи Украинскиот претседател
Од друга страна, рускиот претседател Владимир Путин им се заблагодари на своите војници за пожртвуаноста во специјалната воена операција, за како што рече одбрана на Русија.
„Им оддаваме почит на сите оние кои ги ризикуваа своите животи, со храброст и смелост, со љубов кон Русија. Тие ја исполнуваат својата воена должност кон нашиот народ во специјалната воена операција“, изјави Путин.
Урсула Фон Дер Лајен и Марио Кошта, лидерите на ЕУ допатуваа во Украина за да дадат поддршка на украинскиот народ, и да се сретнат со Зеленски. Но, носат порака дека вчерашните обиди за нов пакет санкции кон Русија не вродија со плод. Унгарија стави вето на пакетот за поддршка на ЕУ од 90 милијарди евра за Украина, од кои 60 милијарди евра се наменети специјално за нејзина одбрана од рускиот напад.
Според Виктор Орбан, унгарскиот Премиер, Украина намерно го саботира нафтоводот дружба.
„Додека нафтата не тече низ Дружба, нема да има пари за Украина“, напиша на социјалната мрежа X.
Американскиот претседател подоцна ќе има свое обраќање, но тој останува посветен на изнаоѓање на мир помеѓу завојуваните страни. Веќе во четврток се очекува нова рунда преговори, најверојатно во Женева, помеѓу претставниците на Русија и Украина, предводени од САД за воспоставување мир.
