Општина Гази Баба рано утрината започна акција за рушење на бесправно изграден објект во Инџиково. Според информациите од градоначалникот Бобан Стефковски, акцијата почнала во 5 часот наутро, по претходна координација со Министерството за внатрешни работи.
Станува збор за објект во фаза карабина, кој требало да се надградува и покрај претходните забрани од надлежните служби.
„И покрај донесеното решение од градежниот инспектор за стопирање на градбата и затворање на градилиштето, субјектот не постапил по решението и продолжил со градежни активности“, информираше Стефковски.
Градоначалникот упати апел до граѓаните да не започнуваат градби без потребната документација, нагласувајќи дека законот ќе важи еднакво за сите.
