Македонска делегација, предводена од министерката за енергетика, рударство и минерални суровини Сања Божиновска, заедно со тимот од Секторот за нафта и гас во Министерството и раководните лица од Номагас, МЕМО и МЕПСО, престојуваше во Белград на покана на српската министерка за рударство и енергетика Дубравка Хандановиќ Ѓуровиќ. Главниот фокус на посетата беше забрзаната реализација на гасниот интерконектор меѓу Северна Македонија и Србија – проект од стратешко значење за регионалната поврзаност и долгорочната енергетска безбедност.
Како што информира Министерството за енергетика, на работната средба беа разгледани клучните технички, финансиски и институционални чекори потребни за продолжување на активностите за изградба на интерконекторот. Овој инфраструктурен проект, со вкупна должина од околу 67 километри (23 km на територијата на Македонија и 44 km во Србија), ќе ги поврзе гасните системи на двете земји – на македонска страна со приклучување кај Клечовце, а во Србија со националната гасоводна мрежа во близина на Врање.
За финансирањето има интерес и од Светската банка и други комерцијални банки, бидејќи интерконекторот претставува дел од пошироката визија за интегриран, диверзифициран и сигурен регионален пазар на гас. Согласно усогласената динамика, неговата изградба се очекува да биде завршена во текот на 2027 година. Во 2028 година низ новиот гасовод се очекува да протече и првиот гас. Интерконекторот е предвиден и да биде технички подготвен за идниот транспорт на водород, усогласено со долгогодишните европски енергетски цели и зелените политики.
Министерката Божиновска истакна дека проектот напредува согласно утврдена и усогласена динамика меѓу двете работни групи.
-Интерконекторот со Србија е клучниот проект што ќе ја отвори нашата земја кон нови извори на гас и ќе ја засили регионалната енергетска стабилност. Но ова е и една од најважните инфраструктурни врски за целиот регион – значајна не само за Македонија и Србија, туку и за цела Европа. Имаме завршени студии, усогласена рута и координирана акција која веќе се спроведува. Нашата цел е интерконекторот да стане реалност во најскоро време, затоа што секој ден е важен за сигурноста на граѓаните и економијата, истакна Божиновска.
Српската министерка Хандановиќ Ѓуровиќ ја нагласи важноста на заедничката регионална визија.
-Гасниот интерконектор со Македонија е проект што има значење подалеку од нашите граници. Тој е дел од визија за регион кој е енергетски поврзан, стабилен и усогласен со европските цели. Соработката со министерката Божиновска и македонскиот тим е интензивна и конструктивна. Со поддршка од ‘Транспорт гас Србија’ и ‘Номагас’ ќе создадеме нова енергетска оска на стабилност меѓу двете земји. Се согласивме на интензивни редовни средби, со цел интерконекторот да стане реалност во најскоро време, рече министерката.
Двете делегации ја потврдија целосната посветеност за интензивна координација и навремено исполнување на сите обврски.
На крајот од средбата беше потврдена заедничката определба за силна институционална и техничка координација со јасна цел – гасниот интерконектор Македонија – Србија да стане функционална, модерна и безбедна енергетска врска која ќе обезбеди поголема сигурност, диверзификација и регионална интеграција, во интерес на граѓаните, економијата и целиот регион.
Дел од делегацијата што ја предводеше министерката Божиновска, беа и директорот на Номагас, Недим Рама, заменик директорот на МЕПСО, Александар Пауновски, директорот на МЕМО, Зоран Ѓеорѓиевски и раководителот на Секторот за нафта и гас при МЕРМС, Горан Николовски.
