Глобалните цени на храната полека, но сигурно бележат значителен раст поради сушите и проблемите со транспортот преку Црното Море, што наесен може да го прекине периодот на ценовно смирување во Македонија.
Според најновата анализа на „Оксфорд Економикс“, цените на храната во светот ќе пораснат за 11,8 проценти во 2026 година, при што најголем притисок се очекува кај житарките, свежиот зеленчук и млечните производи.
Главните причини за новиот ценовен шок се топлотните бранови, кои ги намалија приносите кај големите производители, зголемените цени на ѓубривата и горивата, како и обновените прекини во поморскиот извоз.
Европското здружение „Косерал“ ја намали прогнозата за жетвата на жито во ЕУ и Велика Британија на 286,6 милиони тони, што е значителен пад во однос на ланските 310 милиони тони.
За разлика од развиените европски земји, секое поскапување на основните намирници во Македонија може да има директен и силен удар врз животниот стандард. Податоците на Државниот завод за статистика покажуваат дека трошоците за храна и пијалаци зафаќаат 50,1 процент од вкупниот семеен буџет.
Дополнителен притисок врз пазарот создаваат и зголемените трошоци за производство во домашното земјоделство.
