Евтини кредити за зелена енергија бараат компаниите за да им се намалат трошоците бидејќи од први јануари ќе треба да плаќаат такса за загадување за извезените производи во ЕУ согласно нивото на т.н. јаглероден отпечаток. Помошта значително ќе им помогне на бизнисите од челичниот и цементниот сектор. Од Здружението на метална и електроиндустрија велат дека ќе има притисок врз цените, но и дека не очекуваат да ги изгубат долгогодишните клиенти со кои имаат одлична соработка.
– Во секој случај цената ќе биде оптеретена и компаниите се подготвуваат да се соочат со тоа. Цената ќе трпи, секако тоа е домино ефект, но сметам дека компаниите се подготвуваат долго време и секој веќе размислува како да се справи со тоа, вели Марта Наумовска – Грнарова од Македонска асоцијација на метална индустрија МАМЕИ.
Министерката за енергетика Сања Божиновска рече дека се уште не се знае колкава такса ќе треба да се плаќа и дека најавите биле да се утврди надомест врз основа на соодносот на обновливинаспроти загадувачки извори на енергија на државно ниво. Во Македонија доминира струјата од јаглен од домашните термоелектрани, додека обновливите извори учествуваат со 40%. Надлежните се уште преговараат и очекуваат одредени иземања и пролонгирања на обврските. За компаниите што побрзо да ги намалат емисиите на јаглерод диоксид, беше промовиран и Водич за декарбонизација.
Заострените регулативи за животната средина бараат од бизнисите да употребуваат еколошки материјали, да ја намалат потрошувачката на енергија и да го минимизираат отпадот. За Македонија да постигне целосна декарбонизација во енергетиката, транспортот и градежништвото, според Светска Банка ќе и требаат инвестиции од 5,6 милијарди долари во следните 25 години.
