Би-би-си му се извини на американскиот претседател Доналд Трамп во спорот околу монтажата на документарна емисија, но медиумот исто така соопшти дека нема основа за тужба за клевета од страна на претседателот на САД. Првиот човек на Би-би-си, Самир Шах, испратил писмо до Белата куќа, во кое бара прошка за монтажата на говорот што Трамп го одржал во јануари 2021 година.
Во обемниот прилог за емисијата „Панорама“ на Би-би-си, на едно место биле монтирани исечоци од говорот на Трамп, кои поради монтажата создаваат впечаток дека тој директно ги повикал своите поддржувачи на упад во седиштето на американскиот Конгрес. Притоа, биле изоставени делови од говорот во кои Трамп ги повикува своите поддржувачи да маршираат мирно и патриотски.
Дента кога експлодира скандалот, генералниот директор на Би-би-си и извршната директорка поднесоа оставки. Адвокатите на Трамп му порачаа на британскиот медиум да ја повлече емисијата „Панорама“, да му се извини на претседателот и да плати соодветна отштета или да се соочи со тужба со која ќе се бара отштета од најмалку една милијарда долари.
