Од 1-ви февруари камерите на „Сејф сити“ ќе ги ловат несовесните возачи.Собранието го изгласа Законот за прекршоци со 81 глас „за“ и 19 „против“. По барање на координаторката на „Европскиот фронт“, Рина Ајдари, гласањето беше номинално, односно секој пратеник гласаше поединечно.Дел од пратениците на ДУИ дадоа поддршка за законските измени со што се обезбеди двотретинско мнозинство.
Камерите на “Сејф сити” автоматски ќе регистрираат сообраќајни прекршоци како брзо возење, минување на црвено светло и непрописно паркирање.А возачите ќе добиваат СМС или е-пошта со казната и можност да платат електронски. Сите прекршоци ќе се санкционираат брзо, а целта е повеќе ред и безбедност на улиците.
Министерот Тошковски во повеќе наврати досега потенцираше дека целта на “Безбеден град” не е да казнува, туку да се спасат повеќе човечки животи, но и да се подобри сообраќајната култура.
Интегративците кои првично најавија поддршка за законските измени денеска се премислија, па се поделија во гласањето.За дел од нив спорно е што известувањата за прекршоците не биле и на албански јазик.
Пратениците на СДСМ не дадоа поддршка за измените на законот. Стравуваат дека податоците на граѓаните ќе бидат злоупотребени.
Со стапувањето во сила на измените, „Сејф сити“ ќе почне да функционира во Скопје, Куманово и Тетово, како и на делници од Коридорите 8 и 10, каде досега камерите работеа пробно и испраќаа само опомени. Казнните за брзо возење ќе се движат од 15 до 300 евра, во зависност од тоа колку е надмината дозволената брзина. Поминување на црвено светло – казната е околу 250–300 евра. И за неправилно паркирање ќе се наплаќа околу 45 евра.
